«Манчестер Юнайтед» фахрийси Уэйн Руни Майкл Кэррикнинг «қизил иблислар» бошқарувидаги иши ҳақида ўз фикрлари билан ўртоқлашди. Мутахассис жорий мавсум якунига қадар «МЮ»нинг вақтинчалик мураббийи этиб тайинланган эди. У қишда истеъфога чиқарилган Рубен Аморимнинг ўрнини эгаллади.

Рунининг ҳисоблашича, Кэррик доимий асосда «Юнайтед» бош мураббийи лавозимини олиши керак. Уэйн ҳозирги вазиятда «МЮ»да устозни алмаштиришдан маъно кўрмаяпти.

«Майкл Кэррик бу ишни 100 фоиз олиши керак. Мен уни жуда яхши танийман... Унинг характерини, шахсиятини биламан. Ундан яхши мураббий чиқишини тушунгандим.

Биз «МЮ» сифатлироқ ва жамоа сифатида анча жипслашган ҳолда ўйнаётганини кўряпмиз. Ҳозирда «Юнайтед» кучли жамоа бўлиб кўринмоқда. Менимча, ниманидир ўзгартиришдан нима наф? Кэррик «Манчестер Юнайтед»нинг барча мураббийлари орасида энг яхши ғалаба фоизига эга. Менинг фикримча, у бу лавозимга лойиқ», — деди Руни.