Италиянинг «Рома» клуби келаси ёзда «Эвертон» ҳимоячиси Виталий Миколенкони ўз сафига қўшиб олиш имкониятларини кўриб чиқмоқда. Бу ҳақда Sport Witness нашри хабар тарқатди.
Римликлар молиявий чекловлар ва айрим футболчиларнинг эҳтимолий кетиши сабабли таркибни қайта қуришни режалаштирмоқда. Бу вазият «Рома» раҳбариятини арзонроқ ёки эркин агент мақомидаги вариантларни кўриб чиқишга мажбур қилмоқда ва Миколенко номзодлар рўйхатига киритилган. «Бўрилар» қароргоҳида у дарҳол асосий таркиб футболчисига айлана олишига ишонишмоқда.
Шу билан бирга таъкидлаш жоизки, Миколенконинг ўзи жамоасини ўзгартиришни истамаяпти ва «Эвертон»даги ҳолатидан мамнун. Клуб унинг шартномасини 2027 йилгача узайтириши ҳам мумкин.
Қизиқ жиҳати шундаки, «Рома» ва «Эвертон»нинг эгаси бир хил (Фридкинлар оиласи), шу боис назарий жиҳатдан клублар ўртасидаги келишув амалга ошиши эҳтимоли бор. Айни дамда «Рома» шунчаки вазиятни кузатмоқда ва мавжуд вариантларни баҳоламоқда.
