Испаниянинг “Реал Мадрид” клуби президенти Флорентино Перес “Бавария” юлдузи Майкл Олисени қўлга киритиш учун ҳаракатларни шахсан ўз назоратига олди. Бу ҳақда Германиянинг Билд нашри хабар берди.
Қайд этилишича, Перес йирик трансферни амалга ошириш ниятида. Агар “қироллик клуби” ушбу мавсумни ҳам муваффақиятсиз якунласа ҳамда Родриго 2026 йилга қадар сафдан чиққани инобатга олинса, “қаймоқранглилар” ёзда футболчи учун 160 миллион евро тўлашга тайёр.
Хабарларга кўра, “Бавария” раҳбарияти билан бундай миқдордаги таклифни муҳокама қилиш мумкин.
Олисе Мюнхен клуби билан 2029 йилга қадар имзоланган шартномага эга ва унинг келишувида товон пули ҳақидаги банд мавжуд эмас. Шунга қарамай, футболчининг ўзи 2026 йил ёзда “Реал Мадрид” сафига қўшилишга қарши эмас.
Маълумот учун, Майкл Олисе Германия клубидаги иккинчи мавсумини ўтказмоқда. Футболчи шу вақтга қадар клуб сафида жами 93 та учрашувда майдонга тушиб, ўз ҳисобига 35 та гол ва 50 та голли узатмани ёздириб қўйган. Transfermarkt портали унинг қийматини 140 миллион еврога баҳоламоқда.













