«Бавария» ярим ҳимоячиси Йозуа Киммих Германия терма жамоаси сафида «Реал» ҳимоячиси Антонио Рюдигернинг тутган ўрни ҳақида фикр билдирди.

«Тони — жуда муҳим футболчи. Менда шундай туйғу борки, биз Германияда унинг сўнгги уч-тўрт йил ичида нималарга эришганини баъзида унутиб қўямиз. У «Реал»нинг асосий таркиб ўйинчиси ва ҳар йили Чемпионлар Лигасининг ҳал қилувчи босқичларида ўйнайди. Унга доимо ишониш мумкин. Рюдигер энг юқори савияда тўп сура олишини исботлаб бўлган. Жамоада Рюдигер каби футболчилар бўлиши жуда муҳим», — деди Киммих матбуот анжуманида.

Антонио Рюдигер 2014 йилдан бери Германия терма жамоаси шарафини ҳимоя қилиб келмоқда. У «бундестим» сафида 81 та ўйин ўтказиб, учта гол урган. Ҳимоячи миллий жамоа таркибида Россияда бўлиб ўтган 2017 йилги Конфедерациялар кубоги ғолибига айланган.