«Арсенал»нинг ҳужумкор ярим ҳимоячиси Эберечи Эзе болдир мушагидан жароҳат олди ва «Манчестер Сити»га қарши Лига Кубоги финалини ўтказиб юборди. Куни кеча Эзе Англия терма жамоаси қайдномасидан чиқарилгани эълон қилинди – унинг ўрнига «Ньюкасл» аъзоси Харви Барнс чақирилди.

BBC нашрининг хабарига кўра, дастлабки маълумотларга кўра, Эзенинг тикланиши учун 4 ҳафтадан 6 ҳафтагача вақт талаб этилиши мумкин. Бу эса футболчи мавсумнинг муҳим палласини, хусусан, Чемпионлар Лигаси чорак финали доирасидаги «Спортинг»га қарши иккала ўйинни ҳам ўтказиб юбориши мумкинлигини англатади.

Эберечи Эзе ўтган ёзда «Арсенал» таркибига келиб қўшилган эди. Ўшандан бери футболчи 41 та ўйинда майдонга тушиб, 9 та гол урди ва шерикларига 6 та голли узатмани амалга оширди.