Апрель ойининг охирида Мадриднинг «Реал» клубига тегишли афсонавий «Сантьяго Бернабеу» стадиони ўз қиёфасини ўзгартиради — у вақтинчалик теннис майдонига айлантирилади. Стадион Мадридда бўлиб ўтадиган «Mutua Madrid Open» турнири иштирокчилари — дунё теннис юлдузлари учун машғулот базаси бўлиб хизмат қилади.
Бу воқеа «Реал»нинг Испания чемпионати доирасида 21 апрель (ёки 22 апрель) куни «Алавес»га қарши кечадиган ўз уйидаги ўйинидан сўнг амалга оширилади.
Шундан сўнг «Реал» кетма-кет учта сафар ўйинини ўтказади, улар орасида «Барселона» билан тўқнашув ҳам бор. Эҳтимол, айнан шу баҳс чемпионлик тақдирини ҳал қилиши мумкин. Ҳозирда мадридликлар ўзларининг асосий рақибидан тўрт очко орқада қолишмоқда.
