«Бавария» кузатув кенгаши аъзоси Карл-Хайнц Румменигге Флорентино Переснинг Мадриднинг «Реал» клуби президентлигидаги фаолиятини юқори баҳолади.

«Флорентино «Реал»ни катта иштиёқ билан бошқарадими? Сўзсиз. У доимо клуб учун энг яхшисини истайди. Эсимда, у қачонлардир ўзини муаммо деб ўйлаганда, гарчи аслида ундай бўлмаса-да, четга чиқишга ҳам тайёр эди», — дея Руммениггенинг сўзларини «AS» нашри келтирмоқда.

«У «Реал»ни фақат Сантьяго Бернабеу давридагина эришилган юксакликларга қайтара олди. Одамлар ҳозирги замонда бундай элита даражасини сақлаб қолиш қанчалик қийин эканлигини кўпинча англамайдилар. Флорентино — олтинга тенг», — дея қўшимча қилди Румменигге.

Мадриднинг «Реал» ва Мюнхеннинг «Бавария» жамоалари Чемпионлар Лигаси чорак финалида тўқнаш келишади. Биринчи ўйин 7 апрель куни Мадридда, жавоб баҳси эса 15 апрелда Мюнхенда бўлиб ўтади.