Каталониянинг «Барселона» клуби президенти Жоан Лапорта маҳаллий академиянинг клуб учун нақадар муҳимлиги ҳақида ўз фикрлари билан ўртоқлашди.
«Кўк-анорранглилар»нинг асосий таркибида «Ла Масия» битирувчилари мунтазам равишда кўриниш бермоқда. Клуб бундан кейин ҳам шу йўлдан боришни режалаштирган.
«Ямал, Бернал ва Кубарси асосий таркибга киришдан олдин «Ла Масия»да жамоанинг ўзагини ташкил қилишган. Хави Эспарт ҳам айнан шу авлод вакили ҳисобланади. Улардан аввал Гави, Фермин, Бальде ва Эрик Гарсия бор эди. «Ла Масия» — бизнинг лойиҳамиз асоси. Биз академияга таянамиз, трансфер бозорига эса фақат алоҳида ҳолатлардагина чиқамиз», — дея Лапортанинг сўзларини келтиради Barca Universal нашри.
Шанба куни, 4 апрельда, Ханс-Дитер Флик шогирдлари Ла Лига доирасида Мадридда «Атлетико»га қарши баҳс олиб борадилар.
