«Наполи» бош мураббийи Антонио Конте А Серия 31-тури доирасидаги «Милан» устидан қозонилган ғалабадан (1:0) сўнг, миллий терма жамоа бошқарувига қайтиши мумкинлиги ҳақида гапирди.
«Агар мен Италия футбол федерацияси (FIGC) президенти бўлганимда, ўзимни терма жамоа мураббийлигига номзод сифатида кўриб чиққан бўлардим. Лекин шартномам бўйича яна бир йилим бор, кейин келажакни муҳокама қилиш учун Аурелио Де Лаурентис билан учрашаман.
Ўтган йили, сўнгги уч ой давомида менинг «Ювентус»га ўтишим мумкинлиги ҳақида гаплар юрганини унутмаслик керак. Ёки мен адашяпманми? Баъзи жиҳатларга ойдинлик киритиб олиш лозим.
ОАВ менинг номимни номзодлар қаторида тилга олишини тўғри деб ҳисоблайман. Менда терма жамоада ишлаш тажрибаси бор ва у ердаги муҳитни биламан — бу, шубҳасиз, ёқимли, чунки ўз мамлакатини ифода этиш катта бахт. Бироқ ҳозирги ҳолатимни биласиз — бор эътиборимиз «Наполи» билан ишлашга қаратилган.
Жуда афсусдаман. Агар биз Жаҳон чемпионатига чиққанимизда, бу ҳозир яхши ҳолатда бўлган Италия футболи учун катта ютуқ бўларди. Футболда нималар бўлаётганининг мағзини чақишингизни истайман. Бу бизнинг саралашдан ўта олмаганимиз билан боғлиқ биринчи ҳолат эмас. Ўйлайманки, кетма-кет учта Жаҳон чемпионатини ўтказиб юборгандан сўнг, кескин чоралар кўриш вақти келди», — дея Контенинг сўзларини келтирмоқда La Repubblica.
