«Ливерпуль» афсонаси Жон Барнс мерсисайдликлар раҳбариятини бош мураббий Арне Слотга бўлган ишончни сақлаб қолишга чақирди.
«Биз Арне Слот билан АПЛда ғолиб чиқдик ва энди бирдан уни бўшатмоқчимизми? Агар у кетса ва ўрнига, айтайлик, Алонсо келса-ю, дастлабки олти ой ёки бир йилда муваффақиятсизликка учраса-чи? Унда нима қиламиз? Уни ҳам бўшатиб, бошқа бировни чақирамизми? Мен доим мураббийларни қўллаб-қувватлайман, чунки улар клубга ўз муваффақиятлари туфайли келишади. Уларга вақт бериш керак», — дея Барнснинг сўзларини келтирмоқда Liverpool Echo.
Арне Слот Англия Кубоги чорак финалида «Манчестер Сити»дан учралган йирик мағлубиятдан (0:4) сўнг кескин босим остида қолди. Бу мағлубият клуб учун жорий мавсумдаги 15-си бўлди. Аввалроқ «Ливерпуль» раҳбарияти Слотнинг келажагини муҳокама қилиш учун фавқулодда йиғилиш ўтказгани хабар қилинган эди.
Эслатиб ўтамиз, Слот 2024 йилда «Ливерпуль»ни қабул қилиб олган ва 2024/2025 йилги мавсумда жамоа билан Англия Премьер-лигасида чемпионликни қўлга киритган эди. Ҳозирда жамоа 49 очко билан турнир жадвалида 5-ўринда бормоқда ва ЕЧЛ чорак финалига йўл олган.
