«Бавария» дарвозабони Мануэль Нойер Германия терма жамоасига қайтиш борасидаги навбатдаги саволга жавоб қайтарди. Мюнхенликларнинг 40 ёшли сардори «Сантьяго Бернабеу»да «Реал»га қарши кечган (2:1) Чемпионлар Лигаси чорак финал баҳсида 9 та зарбани қайтариб, учрашувнинг энг яхши футболчиси деб топилди.
Ўйин якунлангач, журналистлар юлдузли фахрийдан Жаҳон чемпионатига бориш нияти бор-йўқлигини сўрашди.
«Бу ҳақида ҳамма нарса айтиб бўлинган. Ҳозир бор эътиборим «Бавария»нинг жорий мавсумдаги қолган ўйинларига қаратилган», — дея Нойер терма жамоага қайтишини инкор этди «Sky» телеканалига берган интервьюсида.
Мануэль Нойернинг мюнхенликлар билан шартномаси шу ёзда ниҳоясига етади. Унинг фаолиятини давом эттириш ёки эттирмаслиги ҳозирча номаълум.
