Ҳозирда ўз ватанида «Сантос» шарафини ҳимоя қилаётган «Барселона» ва «ПСЖ» собиқ ҳужумчиси Неймар 2022 йилги Жаҳон чемпионатидан чиқиб кетган пайтларини ёдга олди. Ўшанда Мундиалнинг чорак финалида «селесао» пенальтилар сериясида Хорватияга имкониятни бой берган эди.
«Мен ўз дафн маросимим қандай кўринишда бўлишини кўргандек бўлдим. Кичкина хонада эдим ва у ерга яқинларим кириб келишарди. Барчанинг кўзида ёш, ҳеч ким гапирмасди. Ҳамма шунчаки менга тикилиб турарди. Мен ўзимни тобут ичида тургандек ҳис қилдим», — дея футболчининг сўзларини келтирмоқда Globo.
Неймар 2025 йилнинг январидан бери «Сантос»да тўп сурмоқда. Жорий йилда ҳужумчи олтита учрашувда майдонга тушиб, учта гол ва учта голли узатмага муаллифлик қилди.
