«Будё-Глимт» жамоасининг россиялик дарвозабони Никита Хайкин Норвегия фуқаролигини олди. Бу ҳақда NRK нашри норвегиялик журналист Ян Петтер Сальведтга таяниб хабар бермоқда.
«Ҳозироқ бизга Никита Хайкин Норвегия фуқаролиги ва паспортини олгани ҳақида хабар келди. Бугун бу маълумот расмий ҳужжатлар билан тасдиқланди», — деди Сальведт.
Бир йил аввал Никита ўзида бир нечта паспорт борлигини айтган эди: «Мен Исроилда туғилганман, фуқаролигим бор, шунингдек, Буюк Британия паспортини ҳам олганман. Ўзимни рус деб ҳисоблайман, Россия паспорти — мен учун шараф. Мамлакатда хотиржам яшаш учун Норвегия фуқаролигини олишни режалаштирганман».
Хайкин фаолияти давомида бир қатор Россия клублари тизимида бўлган, катталар даражасида эса «Бней Иегуда», «Хапоэль Кфар-Сава» ва «Бристоль Сити» каби жамоаларда ўйнаган. У фаолиятининг асосий қисмини «Будё-Глимт»да ўтказмоқда.
Никита Россиянинг ўсмирлар ва ёшлар терма жамоаларида ўйнаган бўлса-да, асосий терма жамоада дебют қилмаган. Шу сабабли, дарвозабонда ЖЧ-2026 турнирида Норвегия терма жамоаси шарафини ҳимоя қилиш имконияти мавжуд.
