"Жирона" ярим ҳимоячиси Тома Лемар Ла Лиганинг 31-тури доирасида Мадриднинг "Реал" жамоаси билан бўлиб ўтган учрашувдан сўнг ўз фикрларини билдирди. 10 апрель куни ўтказилган баҳс 1:1 ҳисобидаги дуранг билан якунланди.
Ҳисобида 38 очко бўлган "Жирона" турнир жадвалида 12-ўринда бормоқда ва юқори дивизионда қолишни деярли нақд қилган. Шунга қарамай, футболчи мавсум якунига қадар эҳтиёткорликни сақлашга чақирди.
"Мен хурсандман. Энди биз ўйиндан ўйинга ҳаракат қиламиз ва 42 очко жамғаришга интиламиз. Кейин эса воқеалар ривожини кузатамиз", — дея Лемарнинг сўзларини келтиради Mundo Deportivo нашри.
Шунингдек, у ўзи томонидан киритилган гол ва ўйин тизгини ҳақида ҳам тўхталиб ўтди.
"Зарба беришдан олдин бир оз кутдим ва бу ўз самарасини берди. Биринчи бўлим биз учун қийинроқ кечди, аммо танаффусдан кейин ўйинимизни сезиларли даражада яхшиладик. Биз асосий эътиборни тўп назоратига қаратдик. Бу бизнинг услубимиз ва унга амал қилишда давом этишимиз керак".
Лемар Мадриднинг "Атлетико" клубидан ижарага олинган ҳолда "Жирона" шарафини ҳимоя қилмоқда. 30 ёшли футболчи жорий мавсумда 21 та учрашувда майдонга тушиб, 2 та гол урди ва 2 та голли узатмани амалга оширди.
