«Барселона» ҳужумчиси Ферран Торрес «Эспаньол»га қарши кечган дербидаги (4:1) дублидан сўнг интервью берди. Учрашув шанба куни Ла Лига доирасида бўлиб ўтди.
Клуб миқёсидаги аввалги 13 та ўйинда гол ура олмаган 26 ёшли футболчи 9-дақиқада ҳисобни очди, 25-дақиқада эса иккинчи бор рақиб дарвозасини ишғол қилди.
«Ҳужумчиларни голларига қараб баҳолашларини биламан, мен эса анчадан бери гол ура олмаётгандим. Агар сабр қилсам, эртами-кечми барибир гол уришни бошлашимни тушуниб турардим. Голни нишонлашимга келсак? Атрофимда доим шов-шув — доим қандайдир салбий фикрлар юради. Менинг гол уришимни кўриш уларга ёқмайди, шунинг учун бу уларга йўлланган бир хабар эди», – деди Ферран интервьюда.
Торрес ҳисобида Ла Лиганинг жорий мавсумида аллақачон 14 та гол мавжуд.
