«Барселона»нинг ҳозирдаги спорт директори Деку ўз вақтида жамоадоши бўлган Роналдиньо билан ўтган дамларни хотирлади.

— Роналдиньо ўша пайтда ҳайратланарли даражада порлаган эди. Унга шу қадар яқин бўлиш қандай эди?

— Техника нуқтаи назаридан, мен ундан яхшироқ ҳеч кимни кўрмаганман. У сизни ҳайратда қолдирадиган, оғзингизни очиб қўйишга мажбур қиладиган ишларни бажаришга қодир эди.

Бу футболчи менинг фаолиятимда — у билан бирга ўйнаганманми ёки унга қарши — энг катта таассурот қолдирган инсондир. Бу унинг энг кўп соврин ювортгани ёки «Барселона»да энг кўп титулларга эга бўлгани учун эмас, балки айнан мана шу маънода энг катта таассурот қолдирган, чунки биз бу даврни биргаликда бошдан кечирганмиз.

— 2007/08 йилги мавсумда Роналдиньонинг ишлари юришмади, жисмоний пасайиш кузатилди ва тунги ҳаётга ҳаддан ташқари берилиб кетгани учун танқидларга учради. Унинг гуллаб-яшнаган даври қандай якунланди?

— Шунинг учун ҳам футбол шунчалик жозибали. Қаерда қувонч бўлса, ўша ерда ҳафсала пир бўлиши ва талаблар ҳам мавжуд. Сиз ҳар доим ҳам ғалаба қозона олмайсиз. Албатта, катта жамоалар ҳақида ўйлаганда, уларнинг абадий бўлишини хоҳлайсиз...

Роналдиньо бир авлод тарихида, бизнинг авлоднинг энг юқори чўққисида из қолдирди ва бу клубга қувонч олиб келди. Биргина шунинг ўзи етарли.

— Роналдиньода Криштиану Роналдуда ҳалигача сақланиб қолган амбициялар етишмадими?

— Фақат амбициялар ҳақида гапириб бўлмайди. Криштиану ҳам ҳар доим ғалаба қозонмаган. Футбол — бу якка тартибдаги эмас, жамоавий спорт тури. Биз техник масалалар, кундалик жараёнлар ва бошқа анча мураккаб нарсаларни муҳокама қилишимиз керак.

Биз ғалабаларда қайсидир шахсни илоҳийлаштириб, мағлубиятларда эса барча айбни унинг зиммасига юклаш орқали хато қиламиз. Ваҳоланки, бу жамоавий спорт, — деди Деку.