«Реал» ҳужумчиси Килиан Мбаппе «Жирона» ҳимоячиси Витор Рейс билан тўқнашувдан сўнг юзида қолган жароҳат суратини ижтимоий тармоқларга жойлаштирди.

Эпизод «Реал» — «Жирона» (1:1) учрашувининг 88-дақиқасида содир бўлган эди. Килиан каталонияликлар ҳимоячиси билан тўқнашиб, майдонга йиқилган. Оёқлардаги контактдан ташқари, Рейс тирсаги билан «Реал» форвардининг юзига зарба берган.

Ўша вазиятда бош ҳакам Хавьер Альберола Рохас фол қайд этмаган эди. Трансляция вақтида Мбаппенинг юзидаги қон кўрсатилмаган, Ла Лига буни аниқ ракурс бўлмаганлиги билан изоҳлаган эди.

Бугун франциялик футболчи тиббиёт ходимларидан бири ишлов беришга тайёрланаётган жароҳати акс этган суратни улашди. Мбаппе суратга ҳеч қандай изоҳ қолдирмаган.

Аввалроқ Килианнинг юзига учта чок қўйилгани маълум бўлган эди. У Чемпионлар лигаси доирасида «Бавария»га қарши ўйинда майдонга тушишга тайёр.