Сешанба куни Чемпионлар лигаси чорак финали доирасида «Барселона» ва Мадриднинг «Атлетико» жамоалари ўртасида жавоб учрашуви бўлиб ўтади.
«Кўк-анорранглилар» ярим финалга чиқиш учун иккита тўп фарқини йўққа чиқаришлари керак — дастлабки баҳсда улар ўз майдонларида 0:2 ҳисобида имкониятни бой беришган эди. Журналист Габриэль Санснинг хабар беришича, каталонияликлар устози Ханс-Дитер Флик Мадридга барча футболчиларни, жумладан жароҳатланганларни ва дисквалификация қилинган Пау Кубарсини ҳам олиб кетмоқчи. Немис мутахассисининг фикрича, бу чора муҳим баҳс олдидан жамоавий руҳни мустаҳкамлайди.
Эслатиб ўтамиз, «Барселона» ўз майдонида кечган ўйиннинг биринчи бўлими охирида Кубарсининг четлатилиши сабабли бир киши кам бўлиб қолган эди — айнан шу сабабли у жавоб учрашувини ўтказиб юборишига тўғри келади.
