«Барселона» Чемпионлар лигаси 1/4 финали доирасида Мадриднинг «Атлетико» клубига қарши кечадиган жавоб учрашувига тайёргарлик кўрмоқда.

«Кўк-анорранглилар» дастлабки баҳсда 44-дақиқадан бошлаб бир киши кам бўлиб ўйнашди ва «матрасчилар»га имкониятни бой беришди (0:2). Marca нашрининг хабар беришича, Мадриддаги ҳал қилувчи ўйин олдидан «Барселона» кийиниш хонасида ўзгача муҳит ҳукм сурмоқда — футболчилар жуда юқори мотивацияга эга ва ўз кучларига ишонишмоқда. Жамоа аъзолари иккита тўп фарқини йўққа чиқариб, ярим финалга йўл олишга қодирмиз, деб ҳисоблашмоқда.

Каталонияликлар учун сафарда кечадиган «Атлетико»га қарши баҳс сешанба куни, 14 апрелда бўлиб ўтади. Ушбу қарама-қаршилик ғолиби ярим финалда Лондоннинг «Арсенал» ёки Лиссабоннинг «Спортинг» жамоаларидан бири билан тўқнаш келади.