Ҳужумчи Ведат Мурики «Мальорка» сафида Ла Лигада гол уриш бўйича Самуэль Это’О ўрнатган рекордни янгилади.

Косовалик футболчи Ла Лиганинг 31-тури доирасида «Райо Вальекано»га қарши кечган баҳсда (3:0) дубль қайд этди. Эндиликда Мурикининг «Мальорка» сафида Ла Лигада урган голлари сони 55 тага етди. Шу тариқа, 31 ёшли форвард Испания олий дивизионида клуб учун 54 та гол урган Это’Одан ўзиб кетди.

Барча мусобақаларни инобатга олганда, «Мальорка» тарихидаги энг яхши тўпурар Жоан Морро Альберти ҳисобланади — унинг ҳисобида 94 та гол бор.

Жорий мавсумда Мурики Испания чемпионатида 21 та гол уришга муваффақ бўлди. У Ла Лига тўпурарлар пойгасида Мадриднинг «Реал» клуби ҳужумчиси Килиан Мбаппедан иккита голга ортда қолган ҳолда иккинчи ўринда бормоқда.