Мюнхеннинг «Бавария» клуби дарвозабони Мануэль Нойер Чемпионлар лигаси чорак финалидан ўрин олган «Реал Мадрид»га қарши жавоб учрашувида жамоасининг пенальтилар сериясидаги имкониятларини баҳолади.

Дастлабки ўйинда «Бавария» рақибидан устун келган эди (2:1). Жавоб баҳсида мадридликларнинг ҳар қандай битта тўп фарқи билан қозонадиган ғалабаси ўйинни қўшимча бўлимларга олиб келади.

«Сиз рақиб ўйинчиларини ва уларнинг нимани афзал кўришларини биласиз. Таҳлиллар олдиндан ўтказилади. Бироқ дарвозабон сифатида рақибнинг хаёлидан нималар ўтаётганини сезиш қобилиятингизни ҳам ривожлантиришингиз керак. Мен айнан шунга қараб ҳаракат қилишга интиламан», — деди дарвозабон УЕФА матбуот хизматига.

Шунингдек, у 2012 йилда мадридликларга қарши кечган ва ўзи ғолиб сифатида чиққан пенальтилар сериясини ёдга олди. Нойернинг сўзларига кўра, бу сафар ҳам ҳаммаси худди шундай якунланиши кафолатланмаган.