«Реал Мадрид» Чемпионлар лигаси 1/4 финали доирасида «Бавария»га қарши кечган жавоб учрашувидан (3:4) сўнг УЕФА билан муносабатларни кескинлаштириш ниятида эмас.
Ўйиннинг 86-дақиқасида мадридликлар ярим ҳимоячиси Эдуардо Камавинга рақиб майдонида Харри Кейнга нисбатан фол ишлатди ва ҳуштакдан сўнг тўпни рақибга бермади. Ушбу ҳаракати учун учрашув бош ҳаками Славко Винчич унга иккинчи сариқ карточкани кўрсатиб, майдондан четлатди.
Marca нашрининг ёзишича, Мадрид клуби француз футболчисининг четлатилишини ҳал қилувчи паллада ҳакам томонидан йўл қўйилган алоҳида хато деб ҳисоблайди. Клуб УЕФА билан алоқаларни ёмонлаштирмоқчи эмас.
20 апрель куни «Реал» ва «Брюгге» жамоалари ўртасида УЕФА Ёшлар лигаси финали бўлиб ўтади. Таъкидланишича, ушбу ўйинда Мадрид клуби делегацияси вакиллари ва УЕФА президенти Александер Чеферин учрашиши мумкин.
