Якшанба куни «Пари Сен-Жермен» Лига 1 доирасидаги учрашувда ўз майдонида «Лион»дан мағлубиятга учради (1:2). Париж гранди 18-дақиқага келибоқ иккита гол ўтказиб юборишди. Франция ОАВларининг маълумотларига кўра, бу «ПСЖ»нинг клуб Қатар фонди томонидан сотиб олинганидан бери қайд этган антирекордидир: 2011 йилдан буён бирор марта ҳам Франция чемпионати баҳсларида рақиб жамоа «Парк де Пренс»да бунчалик эрта икки тўп фарқи билан олдинга чиқиб олмаган эди.
Гарчи ўйин сўнгида Хвича Кварацхелия битта тўп жавоб қайтарган бўлса-да, дастлабки голлар «тўқувчилар»нинг ғалабаси учун кифоя қилди. Луис Энрике жамоаси ҳамон Лига 1 турнир жадвалида пешқадамлик қилмоқда, бироқ энди улар «Ланс»ни бор-йўғи бир очкога ортда қолдиришмоқда. «Лион» эса тўртинчи поғонадан жой олган.
