«Ливерпуль» бош мураббийи Арне Слот дарвозабон Георгий Мамардашвили Мерсисайд дербисида олган жароҳати туфайли шифохонага олиб кетилганини тасдиқлади.
АПЛнинг 33-туридан ўрин олган «Эвертон»га қарши учрашув «Ливерпуль»нинг 2:1 ҳисобидаги ғалабаси билан якунланди.
Грузиялик футболчи рақиб голидан олдинги вазиятда тўқнашувга дуч келди ва шундан сўнг захирага олинди. Тўқнашув вақтида дарвозабон тиззасидан зарба қабул қилиб олди, унинг ўрнига майдонга Фредди Вудман тушди.
«Уни шифохонага олиб кетишди. Назаримда, унинг тиззасида катта очиқ жароҳат бор эди. Бу узоқ муддатли жароҳат бўлмайди, аммо унинг келаси ҳафта майдонга туша олишини кузатамиз. Деярли барча позицияларда муаммоларимиз бор эди, энди эса иккита дарвозабонимиз сафдан чиқди. Яхшиямки, бизда учта дарвозабон бор — одатда бизда қанот ҳимоячилари ёки чап қанот вингерлари бунчалик кўп бўлмайди», — дея Слотнинг сўзларини келтиради Sky Sports.
Захирадан майдонга тушган Вудман «Ливерпуль»га 2025 йилда «Престон Норд Энд» клубидан келиб қўшилган эди. 29 ёшли инглиз футболчиси ушбу баҳсга қадар атиги бир марта — Лига кубоги доирасидаги «Кристал Пэлас»га қарши ўйинда (0:3) майдонга тушган эди.
