«Бавария» ҳужумчиси Ҳарри Кейн Бундеслиганинг 30-турида «Штутгарт» устидан қозонилган ғалаба (4:2) ва жамоанинг муддатидан олдин чемпионликни қўлга киритгани ҳақида ўз фикрларини билдирди. Кейн танаффусдан сўнг захирадан майдонга тушиб, мавсумдаги 31-голини урди. Шу тариқа, унинг «Бавария» сафида барча мусобақалардаги голлари сони 51 тага етди.
«Бу биз учун фантастик мавсум бўлди ва биз чемпионатни мана шундай кўп голлар билан якунладик. Буларнинг барчаси жамоадаги муҳит туфайли: футболчилар биринчи ўйиндан то охиргисигача қаттиқ курашишни тўхтатмадилар. Бошқа турнирларда ҳали қиладиган ишларимиз кўп, аммо қилинган барча меҳнатлар ва бирга ўтказилган кунлар яна чемпион бўлишимиз учун арзирли эди», — дея Кейннинг сўзларини келтиради ESPN.
