«Манчестер Юнайтед» сардори Бруну Фернандеш АПЛ 33-тури доирасида «Челси» устидан қозонилган ғалабанинг (1:0) аҳамияти ҳақида ўз фикрлари билан ўртоқлашди.
«Бу ажойиб туйғу. Бизга мана шундай ўзимизга келиб олиш зарур эди — гап нафақат «Лидс» билан бўлган охирги ўйинда, балки унгача бўлган ва биз ғалаба қозона олмаган яна иккита баҳс ҳақида бормоқда. Шунга қарамай, биз сифатли ўйин кўрсатишимиз кераклигини билардик, чунки «Челси» — жуда кучли жамоа.
Бу ердаги ғалаба биз учун жуда муҳим эди, чунки мақсадимиз кучли тўртликка кириш, улар эса бешликка энг яқин турган жамоадир. Биз улардан ўзимизни узоқлаштиришимиз керак эди, бу ғалаба бизга сув ва ҳаводек зарур эди», — деди Фернандеш TNT Sports нашрига.
«Манчестер Юнайтед» ушбу ғалабадан сўнг 58 очко тўплаган ҳолда АПЛ жадвалида учинчи ўринни эгаллаб турибди. «Челси» эса кетма-кет тўртинчи мағлубиятини қабул қилиб олди. Лондонликлар 48 очко билан олтинчи поғонада боришмоқда.
