«Арсенал» клуби собиқ футболчиси ва эксперт Пол Мерсон «Челси» ярим ҳимоячиси Энцо Фернандеснинг жамоадаги келажаги ҳақида гапирди. Мерсоннинг фикрича, аргентиналик футболчининг трансфер қиймати унинг бошқа клубга ўтишини деярли имконсиз қилиб қўяди.

«Мен Энцо Фернандеснинг «Челси»ни тарк этишига ишонмайман. У қаерга ҳам борарди? Ҳеч ким у учун 100 миллион фунт стерлинг тўламайди. «Челси» эса ўз навбатида бу трансфердан зарар кўришга рози бўлмайди», — деди Мерсон Sky Sports телеканалига берган интервьюсида.

Эслатиб ўтамиз, Энцо Фернандес 2023 йилда «Бенфика»дан 121 миллион евро эвазига сотиб олинган эди. Жорий мавсумда 25 ёшли ярим ҳимоячи лондонликлар сафида барча турнирларда 47 та ўйинда майдонга тушиб, 12 та гол ва 6 та голли узатмага муаллифлик қилди. Унинг «кўклар» билан шартномаси 2032 йилгача имзоланган.