Бундеслига чемпионлигини муддатидан олдин нақд қилган Мюнхеннинг «Бавария» клуби энди бор эътиборини Чемпионлар лигасига қаратмоқда. Мюнхенликларни ярим финалда мусобақанинг амалдаги ғолиби — Франциянинг «ПСЖ» жамоасига қарши баҳс кутиб турибди.
Англиялик ҳужумчи Ҳарри Кейн мавсумни юқори нотада якунлаш ниятида эканини билдирди.
«Эндиги вазифа — мавсум якунини бой бермаслик. Бу ҳам мамлакат кубогига, ҳам Чемпионлар лигасига тегишли. Биз ушбу мусобақаларда ҳам зафар қучишни истаймиз», — дея Кейннинг сўзларини келтирмоқда SkySportDE.
Эслатиб ўтамиз, англиялик тўпурар 2023 йилдан буён Германия гранди шарафини ҳимоя қилиб келмоқда. Унгача эса у узоқ вақт давомида Лондоннинг «Тоттенҳэм» клубида фаолият юритган эди.
Маълумот учун, «Бавария» ва «ПСЖ» ўртасидаги дастлабки ярим финал баҳси 28 апрель куни бўлиб ўтиши режалаштирилган.
