«Реал Мадрид» бош мураббийи Альваро Арбелоа жамоасининг жорий мавсумда чемпионликни қўлга киритиш имкониятларини баҳолади.
«Ла Лигадаги ғалабами? Бизнинг мақсадимиз — «Барселона»нинг натижаларидан қатъи назар, қолган барча олтита ўйинда ғалаба қозониш. Биз бор эътиборимизни ҳар бир учрашувда зафар қучишга қаратганмиз, бироқ чемпионлик тақдири фақат бизнинг қўлимизда эмас», — деди Арбелоа.
Айни дамда «Реал» Испания чемпионати турнир жадвалида 73 очко билан иккинчи ўринда бормоқда. Мадрид клуби пешқадам «Барселона»дан тўққиз очкога ортда қолмоқда. Эртага, 24 апрель куни «қаймоқранглилар» «Бетис»га қарши майдонга тушишади. Бундан ташқари, жамоаларни 10 май куни ўзаро тўқнашув (Эл-Класико) кутиб турибди.
