«Милан» ҳимоячиси Фикайо Томори Италия А Сериясининг 34-туридан ўрин олган «Ювентус»га қарши баҳс олдидан гапириб ўтди. Учрашув якшанба, 26 апрель куни Тошкент вақти билан соат 23:45 да бошланади.

«Верона»даги ғалаба (1:0) эвазига ҳафтани яхши бошладик. Кетма-кет иккита мағлубиятдан кейин «Бентегоди»да уч очко олиш муҳим эди ва биз буни уддаладик. Ҳозир жанговар руҳиятимиз ва кайфиятимиз анча юқори.

«Ювентус»? Бу ажойиб ўйинчилар ва жуда яхши мураббийга эга бўлган буюк жамоа. Мен Богани «Челси» ёшлар жамоасида бирга ўйнаган пайтларимиздан бери биламан. У ҳам Йилдиз, Тюрам, Консейсау ва Дэвид каби кучли футболчи», — дея Томорининг сўзларини келтиради La Gazzetta dello Sport.

Айни дамда «Милан» 66 очко билан А Серия турнир жадвалида иккинчи ўринни эгаллаб турибди. Ҳисобида 63 очко бўлган «Ювентус» эса тўртинчи поғонада бормоқда.