«Барселона» бош мураббийи Ханс-Дитер Флик «Хетафе» устози Хосе Бордаласнинг фикрларига муносабат билдирди.

Испаниялик мутахассис Фликни рақибларнинг ўйини ҳақида ҳаддан ташқари кўп гапиришда айблаган эди. Журналистлар шанба кунги «Хетафе»га қарши баҳс олдидан германиялик мураббийдан ушбу вазиятга изоҳ беришни сўрашди.

«Якуний хулосада у ҳақ – бор эътиборни ўз жамоангга қаратганинг маъқул. Бироқ баъзида ўйиндан сўнг ҳиссиётлар устунлик қилади. Бу табиий ҳол, ҳеч қандай муаммо йўқ», – деди Флик матбуот анжуманида.

Каталония гранди учун сафарда кечадиган «Хетафе»га қарши баҳс Тошкент вақти билан соат 19:15 да бошланади. Агар «кўк-анорранглилар» ғалаба қозонса, таъқибчилар учун деярли етиб бўлмас даражага чиқиб олишади – Мадриднинг «Реал» клуби билан орадаги фарқ 11 очкогача етади.