«Реал» клуби телеканали эфирида Ла Лиганинг «Бетис»га қарши ўйини (1:1) ҳақида кескин фикрлар билдирилди. Мазкур баҳсда бош ҳакам Сесар Сото Градо Рикардо Родригеснинг қўл билан ўйинидан сўнг пенальти белгиламаган эди.
«Тезкор тасвирларни кўрсатмаслик орқали телетрансляция ёки ВАР тизимини манипуляция қилиш... Биз бу ҳақда жамоа ғалаба қозонганида ҳам, дуранг ўйнаганда ёки мағлуб бўлганида ҳам гапирамиз.
Гонсалес Фуэртес [ВАР ҳаками] эпизодни кўрди, лекин Сото Градони огоҳлантирмади. Бундай вазиятларда футбол ҳақида гапириб бўлмайди.
Тебас ва Негрейра лигаси 17 мавсумдан бери қайси жамоа юқори дивизионга чиқиши ёки ундан тушиб кетишини белгилаб бермоқда. Доимий манфаатлар тўқнашувига йўл қўйиб бўлмайди.
Яқинда «Барселона» даҳшатли ўйин ўтказди ва совға сифатида пенальти олди. Ёмон ўйиннинг ўзи гуноҳ эмас, лекин бундай ҳакамлик — ҳақиқий гуноҳдир», — деди «Реал ТВ» бошловчиси эфир пайтида.
