Лондоннинг «Тоттенхэм» клуби Англия Премьер-лигасининг 34-турида «Вулверхэмптон» устидан ғалаба қозонган (1:0) бўлса-да, ҳамон мусобақа жадвалининг қуйи қисмида қолмоқда. Роберто Де Дзерби шогирдларининг муваффақияти ва «Вест Хэм»нинг «Эвертон» устидан қозонган ғалабаси (2:1) турнир жадвалидаги вазиятни янада кескинлаштирди.

Айни дамда «шпорлар» 34 очко билан 18-ўринни эгаллаб турибди. Улар жон сақлаб қолиш ҳудудида бораётган «Вест Хэм»дан 2 очко, «Ноттингем Форест»дан 5 очко ва «Лидс»дан 6 очко ортда қолмоқда.

Эътиборли жиҳати, «Вулверхэмптон» билан баҳсдаги ғалаба «Тоттенхэм» учун АПЛ доирасида 2026 йил ҳисобидан биринчиси бўлди. Бунгача лондонликлар янги йилда 9 та мағлубият ва 6 та дуранг қайд этишганди. Жамоа чемпионатдаги охирги ғалабасини ўтган йилнинг 28 декабрида «Кристал Пэлас»га қарши ўйинда қўлга киритган эди.

Лондонликлар навбатдаги турни 3 май куни «Астон Вилла»га қарши ўтказади.