Машҳур собиқ футболчи Иан Райт Лондоннинг «Арсенал» клуби Премьер-лига доирасида «Ньюкасл» устидан қозонилган ғалабаси (1:0) ҳақида фикр билдирди. «Канонирлар» 9-дақиқада Эберечи Эзе томонидан киритилган гол эвазига зафар қучишди.

Микель Артета жамоаси «Манчестер Сити»ни уч очкога ортда қолдирган ҳолда яна турнир жадвалида пешқадамга айланиб олди, бироқ «шаҳарликлар» ўз ўйинини кейинроқ ўтказишади.

«Биз осонлик билан ғалаба қозонаётганимиз йўқ — муваффақиятлар қийинчилик билан келмоқда. Аммо мавсумнинг бу босқичида ишни шунчаки охирига етказиб қўйиш керак. Бу сафар вазифа бажарилди, лекин рақиб ўйинга ёмон ҳолатда етиб келгани бизга қўл келди. «Ньюкасл» мухлислари ўрнида бўлганимда жуда хафа бўлардим, аммо «Арсенал» учун хурсандман», — дея Райтнинг сўзларини келтиради Arsenal News Channel.

Чоршанба куни, 29 апрель куни Лондон гранди Мадридда Чемпионлар лигаси ярим финали доирасида «Атлетико»га қарши майдонга тушади.