Италиянинг «Рома» клуби испаниялик қанот ҳужумчиси Брайан Сарагосанинг трансфер ҳуқуқини сотиб олмайдиган бўлди. Бу ҳақда таниқли инсайдер Фабрицио Романо хабар бермоқда.

Маълум бўлишича, 24 ёшли футболчи жорий мавсум якунланганидан сўнг Мюнхеннинг «Бавария» клубига қайтади. «Рома» Сарагосани шу йилнинг февраль ойида ижарага олган эди. Бироқ ўтган вақт давомида футболчи Рим клуби асосий таркибидан муқим жой эгаллай олмади. У жами 6 та учрашувда майдонга тушиб, бор-йўғи битта голли узатмани амалга оширди, холос.

Маълумот учун, вингернинг «Бавария» билан амалдаги шартномаси 2029 йилга қадар мўлжалланган. Transfermarkt портали футболчининг бозор қийматини 10 миллион еврога баҳоламоқда.