Мадриднинг «Реал» клуби ва Украина терма жамоаси дарвозабони Андрей Лунин «қироллик клуби» раҳбарияти билан учрашув ўтказди. PlanetaRealMadrid ресурсининг хабар беришича, суҳбат давомида посбон Мадрид жамоасини тарк этиш нияти йўқлигини билдирган.
27 ёшли украиналик футболчи Англия Премьер-лигасининг бир қатор клублари ҳамда Миланнинг «Интер» жамоаси томонидан бўлаётган фаол қизиқишларга қарамай, «қаймоқранглилар»га содиқ эканини тасдиқлади.
Лунин жамоада Тибо Куртуа асосий дарвозабон (биринчи рақам) ҳисобланса-да, «Сантьяго Бернабеу»да қолишни ва ўз имкониятини кутишни истамоқда. Андрейнинг «бланкос» билан амалдаги шартномаси 2030 йилга қадар мўлжалланган. Клуб президенти Флорентино Перес ҳам украиналик посбоннинг профессионализми ва жамоа муваффақиятларига қўшаётган ҳиссасини юқори баҳолайди.
Маълумот учун, жорий мавсумда Андрей Лунин «Реал» сафида барча расмий турнирларда 11 та учрашувда майдонга тушиб, ўз дарвозасидан 21 та тўп ўтказиб юборди.
