«Челси» вингери Эстевао жиддий жароҳат олди — унда тизза ости пайларининг тўртинчи даражали йиртилиши қайд этилган. Журналист Жек Россернинг маълумотларига кўра, бразилиялик футболчи шунга қарамай шу ёзда бўлиб ўтадиган Жаҳон чемпионатида иштирок этиш умидини узгани йўқ.

Футболчига яқин бўлган манба шундай деди: «Биз унинг тезроқ тикланишидан умидвормиз. Вақтимиз кам, лекин унинг жароҳати у қадар мураккаб эмас».

Эстевао 2025 йилда 45 миллион евро эвазига «Палмейрас»дан «Челси»га ўтган эди. Унинг «кўклар» билан шартномаси 2033 йил 30 июнгача мўлжалланган.

Жорий мавсумда вингер Лондон клуби сафида барча турнирларда 36 та ўйинда майдонга тушиб, 8 та гол урди ва 4 та голли узатмани амалга оширди.