Испания Ла Лигаси раҳбари Хавьер Тебас Жозе Моуриньонинг Мадриднинг «Реал» клубига қайтиши ғоясини қўллаб-қувватлашини маълум қилди.

Турли манбаларнинг хабар беришича, португалиялик мураббий яна «қаймоқранглилар»ни бошқаришга тайёр. Миш-мишларга кўра, мадридликлар президенти Флорентино Перес аллақачон музокараларни бошлаб юборган.

«Моуриньо «Реал»да? Жозе — шоумен, у билан доим қизиқ. Унинг қайтиши Ла Лига учун фойдали бўлади», — дея Тебаснинг сўзларини келтирмоқда Madrid Xtra.

Ҳозирда Мадрид клубини январь ойида Хаби Алонсонинг ўрнини эгаллаган Альваро Арбелоа бошқармоқда. Мавсум якунлангач, «Реал»да яна мураббий алмашинуви юз бериши кутилмоқда.

Жозе Моуриньюнинг «Бенфика» билан шартномаси 2027 йилгача мўлжалланган. У Мадридда 2010 йилдан 2013 йилгача фаолият юритган.