Мадриднинг «Атлетико» клуби ҳужумчиси Хулиан Альварес трансфер миш-мишлари марказида қолишда давом этмоқда. Аргентиналик юлдузнинг номи сўнгги пайтларда асосан «Барселона» ва Лондоннинг «Арсенал» клублари билан боғланмоқда.
The Touchline нашрига маълум бўлишича, Альварес фаолиятини айнан Ла Лигада давом эттиришни истамоқда. Ҳужумчи Испаниядаги ҳаётидан мамнун ва ўзини бу ерда жуда қулай ҳис қилмоқда. Хулиан Англия Премьер-лигасининг етакчи клублари томонидан бўлаётган қизиқишни юқори баҳоласа-да, унинг учун Испанияда қолиш ва тўп суриш устувор вазифа бўлиб қолмоқда.
Маълумот ўрнида, нуфузли Transfermarkt портали Хулиан Альвареснинг бозор қийматини 90 миллион еврога баҳоламоқда. Бироқ «Атлетико» раҳбарияти ўз тўпурарини қўйиб юбориш учун бундан анча юқорироқ маблағ талаб қилиши аниқ.
