"Ливерпуль" клуби раҳбариятида жиддий ўзгаришлар кутилмоқда — спорт директори Ричард Хьюз "Ал-Ҳилол"га ўтишга "бир қадам" қолгани хабар қилинмоқда. 46 ёшли мутахассис Саудия Про-лигасига кўчиб ўтиш учун уч йиллик шартнома бўйича дастлабки келишувга эришган.

Журналист Николо Скиранинг сўзларига кўра, Хьюз март ойидан бери "Ал-Ҳилол"нинг асосий нишони бўлиб келган.

"Ричард Хьюз янги спорт директори сифатида "Ал-Ҳилол" билан шартнома имзолашга жуда яқин. 3 йиллик шартнома бўйича принципиал келишувга эришилди", — деб ёзди Скира ўзининг X саҳифасида.

Ушбу эҳтимолий кетиш Хьюз ва Майкл Эдвардснинг "Энфилд"даги амалдаги шартномалари якуний босқичга яқинлашаётгани ҳақидаги хабарлар ортидан содир бўлмоқда.

Бундай ҳолат "Ливерпуль" учун ёзги трансфер мавсумини янада мураккаблаштиради. Клуб нафақат узоқ йиллик юлдузлари Муҳаммад Салоҳ ва Энди Робертсоннинг кетишига тайёргарлик кўрмоқда, балки сўнгги вақтлардаги катта харажатли трансфер стратегияси ҳам кучли танқидлар остида қолган.

Ҳозирда "Ливерпуль" Премьер-лигада 4-ўринни эгаллаб турибди ва Чемпионлар Лигаси йўлланмаси учун кураш олиб бормоқда.