Тез орада Роберт Левандовскининг мавсум якунланганидан кейин «Барселона»да қолиш-қолмаслиги маълум бўлади. 37 ёшли футболчининг амалдаги шартномаси июнь ойи охирида ниҳоясига етади.
Barca Universal нашрининг RAC1 га таяниб хабар беришича, келгуси ҳафтада Каталония клуби раҳбарияти польшалик ҳужумчининг агенти билан учрашади. Ушбу учрашувда ўзаро ҳамкорликни давом эттириш бўйича якуний қарор қабул қилиниши кутилмоқда.
Роберт Левандовски 2022 йилдан буён «Барселона» шарафини ҳимоя қилиб келмоқда. Жорий мавсумда форвард Ханс-Дитер Флик жамоаси сафида барча турнирларда 41 та ўйинда майдонга тушди. У ўз ҳисобига 17 та гол ва 4 та голли узатмани ёздириб қўйишга муваффақ бўлган.
