«Барселона» бош мураббийи Ханс-Дитер Флик унинг жамоаси ҳали ўз имкониятларининг энг юқори нуқтасига чиққани йўқ деб ҳисоблайди. Каталонияликлар шанба куни «Осасуна»ни мағлуб этиб (2:1), чемпионликни деярли 100 фоизга нақд қилиб қўйишди. Агар бугун Мадриднинг «Реал» клуби «Эспаньол» билан дуранг ўйнаса ёки имкониятни бой берса, «кўк-анорранглилар» расман титулни қўлга киритишади.

«Бизда фантастик жамоа бор. Кўп нарсани ўргандик ва бу менга келажакка оптимизм билан қараш учун асос бўляпти. Аммо таркибимиз ёш, ҳали ишлайдиган жиҳатларимиз етарли. «Барса»да ҳали очилмаган салоҳият жуда катта. Янги мавсумда янада кучлироқ бўлиш учун астойдил меҳнат қилишимиз керак», – дея Фликнинг сўзларини келтирмоқда Barca Universal нашри.

Келаси якшанба, 10 май куни навбатдаги «эл класико» бўлиб ўтади.