Мадриднинг «Реал» клубидан «Лион»га ижарага берилган ҳужумчи Эндрик Францияда қолмоқчи эканлигини маълум қилди. Ижара шартномаси мавсум якунига қадар амал қилади ва лионликларда бразилиялик футболчини сотиб олиш ҳуқуқи мавжуд эмас. Шунга қарамай, 19 ёшли ўйинчи жамоада қолишдан мамнун бўлишини очиқ-ойдин билдирди.

«Тўғрисини айтсам, «Лион»да қолишни жуда хоҳлардим. Клубда ўзимни қулай ҳис қилишим учун барча ишлар қилинмоқда. Мен бу ерда бахтлиман. Бироқ, агар керак бўлса, албатта «Реал»га қайтаман», — дея Эндрикнинг сўзларини келтирмоқда The Touchline.

Якшанба куни ҳужумчи Паулу Фонсека шогирдларининг «Ренн» устидан қозонилган ғалабасига (4:2) ўз голи билан ҳисса қўшди.