Мадриднинг «Реал» клуби ҳужумчиси Килиан Мбаппе «Барселона»га қарши бўлажак муҳим баҳсгача соғайиб кетиш учун бор имкониятини ишга солмоқда. Бу ҳақда Marca нашри хабар бермоқда.

Маълум қилинишича, франциялик юлдуз чап оёғидаги мушак жароҳатидан тезроқ тикланиш мақсадида жамоавий дам олиш кунларида ҳам базада индивидуал тарзда шуғулланган. Мбаппенинг асосий мақсади — 10 май куни «Камп Ноу»да бўлиб ўтадиган «эл-класико»да иштирок этиш.

«Қаймоқранглилар» тиббий штаби футболчининг ҳолатини кунлик назорат қилиб бормоқда. Сўнгги хабарларга кўра, Килианнинг тикланиш жараёни кутилганидан тезроқ кечмоқда ва унинг якшанба кунги баҳсда қайдномага киритилиши эҳтимоли анча юқори.

Эслатиб ўтамиз, Мбаппе жароҳати сабаб Ла Лиганинг сўнгги тури доирасидаги «Эспаньол»га қарши ўйинни ўтказиб юборган эди.