«Реал» бош мураббийи Альваро Арбелоа Вальверде ва Тчуамени ўртасидаги муштлашув содир бўлган куни клуб базасини кулиб тарк этган ҳужумчи Килиан Мбаппе ҳақида гапирди.
«Бу воқеаларни контекстдан юлиб олишга бўлган уриниш. Бу шунчаки вазиятдан фойдаланиб, ҳамма нарсани бўрттириб кўрсатишдир. Барча мадридчилар Мбаппенинг «Реал Мадрид»га ўтиши учун қанчалик ҳаракат қилганини яхши билишади, чунки аввалги клубида унда ҳамма нарса бор эди. У ўз орзусидаги клубда бўлиш учун кўп нарсани қурбон қилишига тўғри келган», — деди Арбелоа матбуот анжуманида.
Аввалроқ интернетда «Реал» раҳбариятидан Мбаппени сотишни сўраб петиция пайдо бўлган эди. Уни бир неча миллион мухлис имзолаган.
10 май куни «Реал» сафарда «Барселона» билан тўқнаш келади.
