«Реал» раҳбарияти жамоа сардорларини аниқлашнинг амалдаги тизимини қайта кўриб чиқиши кутилмоқда. Бу ҳақда Diario AS нашри хабар берди.
Ҳозирги вақтда клубда асосий сардор ва унинг уч нафар ўринбосари жамоада энг узоқ вақт давомида тўп сураётган футболчилар орасидан автоматик равишда танланади. Бироқ, хабарларга кўра, айрим футболчилар ушбу анъана ўз аҳамиятини йўқотган деб ҳисобламоқда ва сардорларни овоз бериш йўли билан сайлаш таклифини илгари сурмоқда.
Бундай муҳокамаларга яқинда содир бўлган кўнгилсиз воқеа сабаб бўлган. Маълум қилинишича, жамоа вице-сардори Федерико Вальверде ва Орельен Тчуамени ўртасида муштлашув келиб чиққан. Мазкур ҳолатдан сўнг жамоадошлари уругвайлик футболчидан ҳафсаласи пир бўлгани айтилмоқда.
Шунингдек, мавсум якунида жамоанинг амалдаги асосий сардори Даниэль Карвахаль клубни тарк этади. Раҳбарият унинг муддати тугаётган шартномасини узайтирмасликка қарор қилган.
