Англия Премьер-лигаси доирасида «Брентфорд» устидан қозонилган йирик ғалабадан (3:0) сўнг «Манчестер Сити» бош мураббийи Хосеп Гвардиола учрашув ҳақида тўхталиб ўтди.

Мутахассис рақибнинг ўйинини алоҳида эътироф этиб, баҳс осон кечмаганини таъкидлади.

«Рақиб жуда мураккаб эди. Уларнинг қарши ҳужумлари, стандарт вазиятлари ва тўпни ўйинга киритишлари бизга анча ноқулайлик туғдирди. Ўйин бошида қийналдик, аммо кейинчалик жуда яхши ўйин намойиш этдик. Айниқса, биринчи бўлимда чап қанот, иккинчи бўлимда эса ҳар икки қанотимиз самарали ҳаракат қилди», — дейди Гвардиола Sky Sports нашрига берган интервьюсида.

Шунингдек, мураббий жамоанинг ҳужумдаги ҳаракатлари ва Жереми Докунинг ўйини ҳақида ҳам ижобий фикр билдирди:

«Доку кўп жиҳатдан ажойиб ўйин кўрсатди. Иккинчи бўлимда жарима майдончасини тўп билан кўпроқ тўлдиришни бошладик. Биринчи бўлимда буни амалга ошира олмаганимиз учун қийинчиликларга дуч келгандик. Якунда ижобий натижа қайд этдик ва олдинга ҳаракат қилишда давом этамиз».