Лондоннинг «Арсенал» клуби ярим ҳимоячиси Мартин Эдегор Премьер-лига доирасида «Вест Хэм» устидан қозонилган ғалабадан (1:0) кейин ўз таассуротлари билан ўртоқлашди.

Учрашув тақдирини 80-дақиқада киритилган ягона гол ҳал қилди: Леандро Троссар рақиб дарвозасини ишғол этди. Голга захирадан майдонга тушган жамоа сардори Эдегор ассистентлик қилди.

«Бу шунчаки ҳайратланарли. Ўйин жуда оғир кечди, охиригача курашишимизга тўғри келди, лекин бу — Премьер-лига. Бу ерда ҳеч нарса осонлик билан қўлга киритилмайди, бироқ биз мақсадимизга эришдик. Жамоамиз худди катта оилага ўхшайди, бир-биримиз учун охиригача жанг қиламиз. Ортда кўплаб қийин дамлар қолди. Ушбу ғалабани мухлисларимиз билан бирга нишонлаш жуда ёқимли», — деди норвегиялик футболчи ўйиндан кейинги интервьюсида.

Маълумот учун, «Арсенал» 36 турдан сўнг 79 очко билан турнир жадвалида пешқадамлик қилмоқда. Иккинчи ўриндаги «Манчестер Сити» ҳисобида 74 очко бор, бироқ «шаҳарликлар» захирасида битта ўйин мавжуд.