«Астон Вилла» ёзги трансферлар ойнасида «Арсенал» ярим ҳимоячиси Итан Нванерини сотиб олиш имкониятини кўриб чиқмоқда. Бу ҳақда Sports Boom нашри хабар бермоқда.
Манбанинг маълумотига кўра, «Арсенал» 18 ёшли иқтидор соҳибини тахминан 62 миллион евро эвазига сотишга тайёр. Лондон клуби ёзги фаол трансфер кампанияси учун бюджет шакллантиришга интилмоқда. Нванери анчадан бери «Арсенал»нинг энг истиқболли ўйинчиларидан бири ҳисоблаб келинади, бироқ жорий мавсумда у доимий ўйин амалиёти борасида қийинчиликларга дуч келди ва мавсумнинг бир қисмини «Марсель»да ижарада ўтказди.
Алоҳида қайд этилишича, трансфер амалга ошган тақдирда, Нванери жамоада ижара асосида тўп сураётган, аммо ҳозирча асосий таркибдан мустаҳкам ўрин эгаллай олмаган Харви Эллиоттга потенциал ўринбосар сифатида кўрилиши мумкин.
