Миланнинг «Интер» клуби сардори Лаутаро Мартинес жамоа бош мураббийи Кристиан Киву ҳақидаги фикрлари билан ўртоқлашди. «Нерадзурри» аллақачон A Серия чемпионлигини қўлга киритган бўлса, бугун Италия Кубоги финалида «Лацио»га қарши баҳсда «олтин дубль»ни расмийлаштириши мумкин.
«Жароҳатлар билан боғлиқ муаммолар мени тўхтатиб қолганди, аммо мен қаттиқ ишладим ва спорт формамни тиклашга муваффақ бўлдим. Ушбу мавсумдан, жамоамиз ва мураббийимиздан жуда мамнунман. Бошида шубҳалар бор эди, лекин Киву ҳамма нарсага тезда ойдинлик киритди ва ўз маҳоратини исботлади. Биз уни эшитдик ва натижага эришдик», — деди Лаутаро InterTV телеканалига берган интервьюсида.
Кристиан Киву ўтган йилнинг июнь ойида «Ал-Хилол»га кетган Симоне Индзаги ўрнини эгаллаб, «Интер» бошқарувига келган эди.
